Bericht MPS Hamburg 2017

1.-3. September 2017

Wo am Donnstig Obe alles im Ahänger und in de Autos verstaut worde isch, sin dr Chris und dr Ruedi mit em Ahänger los gfahre. Dr Mike und Düsi sin mit em zweite Auto chli spöter los. Dr ganz ander Räscht het sich am 5i am Morge denn bim Stephan troffe und mr sin mit em Taxi zum Flughafe. An der Kontrolle sin alli dure ko, nume unseri Jay hets nit gschafft ohni Piipse dure z ko. 😉 Also Schueh ab nomol dure und denn Sprängstoff kontrolle. S Ergäbnis: Si isch schwanger, es git e Bombebaby. Wo mr uf em Gländ ako sin, isch dr Mike und dr Düsi au scho do gsi und mr hän könne zämme astosse. Dr Stephan und Düsi sin denn mit allne andere 96 Heerlager go e Platz ussueche…

4,5h spöter hän si denn als letschts e Plätzli beko und mr hän könne loslege mit ufstelle. Wo d Jay und d Nömi sin go ikaufe und s Pinky sin go abhole, hän d Jungs afo Fondue vorbereite, denn mir hän der Tod, dr Hässlichi Hans, dr Bruder Rektus, d Julia und dr Sven iglade. Und wenn denn richtig, wie sich das so ghört bim Stadtstaat, hän mir e 5,5 Kg Kääsfondue zauberet. Unseri Gescht hän sich pudelwohl gfühlt und mir hän e mega glatte Obe zämme ka. Mir sin sogar vom Bruder Rektus uf Rippli us em Smoker iglade worde und dr Hans macht uns Mous ou Chocolat. =) Sehr sehr geil!

Achtung Blitzermeldung: Ja wo steht er denn? Ja da wo er immer steht…
Wettermeldung: Meist sonnig und harmlose feuchte Wolken 😉 Radiomeldung aus!

Zrugg zum Fondue, es het nur öper sis Brot verloren und das nit nume is Fondue sonder er hets au uf e Bode keie lo. Und wer isch das gsi? Natürlich unsere Kevin! D Abmachig isch gsi wer si Brot verliert wird teert und gfäderet. Tja Kevin so soll es sein!
Wo unseri Gescht witerzoge sin und au de Hässlichi Hans nüm möge het, sin e paar im Zält verschwunde, nume Pinky, Nömi und de Chris sin no gmietlich zämme ghögglet und hän über Gott, d Wält und Kunst plauderet.

Am negste Morge isch der Wahnsinn Ö los gange. Sowas mues me erläbt ha zum verstoh z könne was das MEGA Ö isch… Do begrifft me de Wärbespruch Das FETTE Ö Alles andere ist niedlich! (spöter meh dezue)

Denn Notiz für alli: (ganz wichtig!!)
#D’ Kerze sind im Südflügel Treppe runter links
#Mr. Hurlay spielt uf dr Mainstage
#Jay war auch da mit Kinderschoggy
# Kinderschoggy, Kinderschoggy, Kinderschoggy

…Mir hän an der Morgemäss könne glänze da unsere Kevin ja si Brot verlore het, hets ganze Heerlager dörfe vorträtte und dr Stäldi isch teert und gfäderet worde… dr Stephan het em denn am Schluss schön d Hose wieder ufe zoge, so dass alles no meh kläbt het. Noch dämm mr dr Kevin badet, gwäsche, putzt und gstrält hän, hets schön Zmorge ge. Wie allewyyl e fette Brunch mit allem was Härz begeert. Mr hoffe fest, dass unsere Düsi nit all zu drurig gsi isch, da s dasmol kei Babykotze geh het, sondern Vogelheu mit Späck, Zwieble oder Öpfelmues. Nochdäm s Nömi ihre Schönheitsschloof nochegholt het isch es au scho losgange mit em Heerlagerumzug. E gigantischi Sach isch das! 96 Heerlager, e ewigs lange Zug, wo sich über s Gländ schlänglet, me seht weder Afang no Änd und MIR dr „kleini“ Stadtstaat mitte drin. Mir hän dass mol e ganz bsundere Gast debi ka. Dr Tingeltangel mit sim Piccolo. Herrlich wie de Pöbel reagiert het druf. Einigi hän sich d Ohre zue ghebt, anderi sin freudig dezu am tänzle gsi oder hän uns zuegjublet. Er het hammer schöni Baslermärsch gspielt. Dr Stadtstaat danggt em Tingeltangel und mr freue uns, wenn wieder debi bisch! Noch em Umzug isch es au grad mit em Brucheballtunier los gange. Unseri Kämpfer hän sich bereit gmacht und dr Fanclub het sich ufgstellt. Leider het d Losfee nit sehr optimal für unsi Gunste zoge und somit het dr Stadtstaat miesse gege e Hamburgermanschaft spiele, wo regelmässig trainiert und spielt. Somit sin mr in der erst Rundi scho use gheit  doch mir lön uns nit unter griege, denn am Sunntig isch jo nomol e Spiel! Also sin mr zrugg zum Lager gwanderet. Me mues das wirklich wandere nenne, denn me brucht vo einere Site zur andere ca 20 Minute. Unseri verruggte Jungs und Jay hän am Obig au no am Pestumzug mit gmacht. D Jay het wieder als Sieche mitgmacht (nächstmol schminke mr di sälber, das bekömme mr nämlich schöner und schnäller ane) und d Jungs sin als Edelgarde debi gsi. D Pinky und Nöme sin no chli go ikaufe uf geheimer Mission. Da alli zimlich erschlage gsi sin vo dene viele Idrügg, Mensche und Aktivitäte sin mr glie mol is Bett. Ah ganz vergässe dr Alex und Tam sin am Nomittag zu uns gstosse und hän sichs in unserem neue Zält gemütlich igrichtet.

Am sunnige Sunntigmorge sin alli putzmunter us ihrne Fälli und Schlofsäck kroche und hän sich bereit gmacht für de neui Daag. Da jetzt de Teil kämmti, wo nur de Düsi, Nöme und Jay debi gsi sin, lön mr de Teil us, denn au der Sogge am Zält het nüt brocht, will Jay nit het wele s Zält verlo =) (aber gäll Düsi Freiheit isch s schönsti 😉 )

Da s dritte Äntli gloge het und au s beste Schreiberlein mängisch nüm alles weiss, hets nit am Samstig sonder am Sunntig Vogelheu ge mit allem drum und dra! Noch em Zmorge sin es paar verschwunde und sin chli go Lädeli, bevors wieder los gange isch mit em gigantische Heerlagerumzug. Dismol hän mir sogar zwei Piccolos debi ka. Dr Tingeltangel het nämlich e Kollegin troffe, wo spontan gfude het si würd gärn mit mache. Zum Glück het d Pinky ihres Piccolo debi ka. E Traum, wie das dönt het, eifach super! Am Brucheballtounier hän mr dismol miese Söldner neh, da unser Düsi us gsundheitliche Gründ nit het könne mitmache und dr Meister Proper scho vorzitig het miese abreise. Dr Düsi het aber als Übersetzer unseri Manschaft tatkräftig unterstützt. Unser Bärg Mike und dr Stäldi hän alles ge und hän au ei Spiel gwunnde. Leider sin si denn im Halbfinal use gheit. Die Männer im Norde sin halt nit so eifach z schlo. Jetzt hän mr aber e Joor Ziit zum trainiere. Au mir Fraue wärde irgendwenn e Manschaft ufstelle und dene Wiiber zeige wie me kämpft. Denn das wo d Wiibermanschaft am Ö zeigt hän isch für nüt gsi!

Nochdäm alli öpis gfunde hän fürs Znachtässe (denn vieli Ständ sin usverkauft gsi), hän mir uns alli im Lager troffe und hän unsere letschte Obe gnosse. Dr Chris het sini Laute debi ka und der Stephan het uns es Singbiechli zämmegstellt. Wärend de Düsi, Michi und Stäldi sin go unserm Schneider des Vertrauens go hälfe abbaue, het de Räst frisch fröhlich e paar Lieder trälleret. Mol ufe, mol abe, mol links, mol rächts, mol füre, mol hindere, mol links, mol rächts… e Burebiebli mani nit… =) wunderschön und unvergässlich die Stimmig wo entstande isch. Dr Tingeltangel unser wandlends Singbuech und dr Chris hän uns, wo mr s Singbiechli dure gsunge hän, no musikalisch unterhalte.

I ka ächt sage es isch e perfekte Abschluss gsi vom MPS Ö. Es sin alli de Meinig, dass mr uf jedefall nögst Joor wieder debi sin. Elei scho, will d Julia uns versproche het, dass mir e Uszeichnig bekömme fürs witischt greiste Heerlager am MPS! Liebe Stadtstaat und all unseri Gefollgschaft, mir dörfe ächt Stolz si uf uns und was mir in dere kurze Ziit erreicht hän. An dere Stell au mol es mega Danke an unseri Passive und Gönner ohni euch wäre mir noni so wit!

Dr Stadtstaat danggt

Euer Schreiberlein

Nömi


Zrugg zu de Bilder

Zrugg zu de Bricht