28. – 31.Juli 2017
Für d Pinky, Stephan &Düsi isch es am Fritigmorge scho los gange. Si sin mit em Material ab nach Karlsruhe. Bim Ufstelle isch es abartig heiss gsi und da dr Stephan no het miese s Auto use fahre und das erst am 4i möglich gsi isch, hän die arme erst denn könne afo Bier trinke. Wo s’Nömi dene drei aglüte het, sin am 5i alli scho belunke gsi, da me jo s Bier am Fritig mues trunke ha. Wäge autentisch und so. Und userdäm mr näme sicher nüt hei! 😉
Dr Mike, s Nömi und dr Michi sin denn au mol ako und denn hets glie Znacht ge. Unseri Heerlagernochbere sin cooli Lüt, die einti isch d Meli 2.0 mit richtigem Name Arkascha e riese Schnurre aber e super tolli Frau. Mit ihre und ihrem Maa hän mr e Gaudi ka.
Am Samstigmorge isch s Standartprogramm los gange. An dr Morgemäss het me wieder mol richtigs dütsches Verhalte könne beobachte. S git was gratis und alli renne. Da s am MPS Weil 2 bi Beerenwein zwenig Met ka het und zur Mittagsstund scho alles usverkauft gsi isch, isch die ganzi Manschaft teert und gfäderet worde und es het ebe gratis Met ge. Mr hän do leider e neue Hauptmann, er isch ok aber mr vermisse unser Hauptmann Wölkchen jetzt scho e chli .
Au dasmol hän mr wieder e Brucheballmanschaft zämme beko. Mr sin zweite worde, hän ein Rippeprellig, e blaue, umeglitzte Zeche und 5 müedi Männer zrugg beko. Zu Bsuech sin d Eltere vom Michi gsi und s Kathi isch zu uns gstosse. Noch em Brucheballtounier sin d Herre go Freibier trinke und s Pinky het s leckere Znacht zuebereitet. Dr Stephan und d Nöme sin go Pfandgläser zurgg bringe. Bi dr Tortuga Inn hän mr ganz viel Gläser abge und e mega faine Schoggirum gno. Die rästliche Bächer hän mr bim Kirschbierstand ab ge und die 12 Euro Pfand vo vorhär sin in Kirschbier umgwandlet worde. Huuuups de ganzi Pfand isch versoffe worde. Aber het Spass gmacht gäll Stephan!? 😛
Noch em Znacht sin e paar ans Knasterbart Konzärt, wo dummerwies d Tortuga Inn wieder hinde dra gsi isch. Noch ere Volle Breitsite und emene andere Getränk (wo er nüm so genau weiss, was es gsi isch) isch dr Michi noch em Konzärt zrugg zum Heerlager. Döt her irgendwas zum Stepahn glallt, vowäge was er miesti noche hole zum so blau zwärde, het sich e Dampfnudle ine druggt und isch uf „diräktem“ Wäg is Zält gschwankt. Er het dr volli Wäg gnosse und zum Glück isch dr Zältigang so gross.
Am Sunntigmorge isch s Grücht ume gange, dass es e Tornado git, es isch denn e mehbessere Rägeschauer gsi mit biz viel Wind. Au hüt hän unseri Jungs wieder am Brucheballtounier mit gmacht und hän dimol au gwunne. Si hän sogar e neue Rekord ufgstellt: 1 Spiel in 8s beändet. Dr blindi Gruchskämpfer Düsi, dr Meister Proper Alex, unsere Fremdmanschaft Spieler Stäldi und dr Bärg Mike hän eifach alles ge für dr Sieg.
Bi dr Shoppingtour vo dr Pinky und dr Nömi isch ihne ufgfalle, dass bi dem Stand, wo mr agfrogt worde sin zum Hälfe abbaue, s Tonschäleli git, wo mr bruche. Dr Stephan het uns denn e guete Deal usghandlet. Dr Düsi & Michi hän am Sunntigobe no bim Schnieder under Vertrauens gholfe abbaue. Irgendwie hän alli gmeint si miese no Met kaufe und somit isch denn Beerenwein leergrumt gsi und mir hätte könne e Lade ufmache. Dementsprächend isch denn au der letschti Obe verloffe =) Dr Mike isch worschienlich so drurig gsi, dass sini Schuehsuechi erfolglos gsi isch, dass er belunke an dr Nici aglänt igschloofe isch no am Tisch. Es isch Krueg um Krueg, Metfläsche um Rosefläsche vernichtet worde. Wos 12i gschlage het isch unsere Düsi 25 worde! Mr hän agstosse und ihm fyyrlich sin bemolte Goldball überreicht! Alles Gueti und nur s Beste für usere Düsi!!
Irgend so e lustige Mensch het uns Kehleschnieder (Chilischnaps) gschänkt und mr häns nit könne lo z probiere. E paar hän sich traut e chli uf e Finger zne und dr Alex het gmeint er mies das Fläschli exe. Dr besti kunnt aber no… S Nömi meint no so: „Haha jedes mol, wenn i in dr Kuchi was mit Chili mach rieb i mr de Seich ind Auge!“ Es isch keini 5 Minute gange isch si hülend am Tisch ghoggt und het ihr Aug fest zue druggt… Jawol au dismol isch dr Finger im Aug glandet und natürlich de wo Kehleschnieder dra gsi isch. Dr Alex mi Retter het zum Glück e Süriusbildig und het genau gwüsst, wie er das Aug het miese usspiele. I würd jetzt gärn sage, dass das jetzt alles gsi isch… aber mr sin noni am Ändi ako… Noch dem ganze usspiele, uf halbem Wäg ufs WC hani miese umkehre da d Bei nüm so ganz hän wele… Adee Kreislauf! Medels und Jungs guete Rot: Ufregig, Alkohol, Kehleschnieder und das alles gmischt, git kei gueti Kombination. Em Alex isch nämlich plötzlich au nüm so guet gsi. Leute Kehleschnieder kotze isch au nüt schöns, wo me mues erläbt ha. Me het denn em Alex e Plätzli im Zält frei grumt und dr Mike is Hotel verschobe. Da mir no Gäst bi uns ka hän und die no us em abgsperrte Gländ hän wele, het de Düsi wele usbräche und het scho s Wärkzüg parat gmacht. Zum Glück het unser Heerlager Mami e einigermasse klare Kopf ka und het die Chaote könne use bringe ohni usbruch. D Pinky, s Nömi und dr Düsi hän denn no kurz d Ruhe gnosse und sin denn au ins Bett verschwunde.
Ab sofort herrscht im Stadtstaat Basel absoluts Kehleschnieder verbot!
Auf ein Balidges Euer Schreiberlein
Nömi