Bericht MPS Weil 1 2018

Wie allewyyl startet d Saison in Weil am Rhein. Dr Ufbau isch dasmol sehr guet gange, d Möbel sin so schnäll wie no nie ufbaut gsi. Noch em Grossikauf isch denn Fahne igweit worde und somit hets offizell könne los go.

Dasmol hän mr Herr und Frau Hase (Tam und Alex), dr Mike, und Cynthia im Heerlager debi. Dr Stäldi unsere dis jöörige Awärter ka leider nit debi si.

Bis es Znachtässe ge het, hän mr us d Ziit mit Königschach und Mäxle vertribe. Da mir jo nit normal sin, hän mr au e eigeni Regle bim Mäxle. Nit s einezwanzig (Mäxle) isch die die höchstmöglichi Zahl sondern s zweievierzig (Sinn des Lebens) Mr. Hase het no e Fläsche «Ischhabrum» debi ka. Die isch scho bim Mäxle druf gange und s Nömi het dr Wiswyy vernichtet.

Zum Znachtässe hets denn mega faini Foliehärdöpfel mit Fleisch und Salat ge. Da s bim Abwäsche vrdächnigs Gelächter ge het und s anschienen zu sexuelle Belästigung  ko isch, hän unseri männliche Hälferli halt mol e Rundi Kläpper usteilt beko.

Dr Michi het sis Projäkt «s Logo in Tisch schnitze» gstartet. Was sehr geil kunt. Wos langsam dunkel worde isch, hän mir e Rundi uf em Gländ gmacht, sin dummerwies ane Tavärne gstosse und dört hänge blibe. Einigi sin dört zimlich versoffe. Kurz nach de eins sin denn aber alli sicher im Bettli a ko.

 

Neue Tag neus Glück

Die meiste, mit sehr wenige usnahme, sin putzmunter ufgstande und in Tag gstartet. Bevor mr ans Morgelala sin, hän mr grad mol wieder Gäld us ge. Morgeshopping =) es het für unseri Awärter, Jooresmitglieder und sustigs Gsindel von Stadtstaat neuei Hemli ge vom Schneider des Vertrauens. Dr Düsi het sich no e paar neui Hose gönnt.

An dr Mogemäss het dr Bruder Rectus denn verkündet, dass es das Joor am Weil 1 kei Brucheballtounier ge wird, da dr Brucheball nit awäsend isch. E riese Entdüschig für alli. Jetzt hän unseri Kämpfer doch extra afo trainiere. Bluet und Schweiss hän si gschwitzt und jetzt das. Drurig sin mr am Morgeässetisch gsässe, doch do het öper DIE Idee ka. Mir hän doch unsere eigene Brucheball de könnte mr go hole. Da aber s Logo vo Hoegaarden druf isch, hän mr gfunde das mien mir zerst mit em MPS Team abspräche. Es het denn leider am Samstig tatsächlich kei Brucheballtounier ge. Aber…. Bitte nit drurig si, abwarte 😉

Unseri Magt (mr nenne an dere Stell wieder mol keini Näme) het dr Kater des Jahrtausend ka. Es isch kei schöne Ablick gsi aber wer suffe ka, mues halt au do dure. Es isch lang gange aber si hets gschaft, si het am Obig sogar könne am Pestumzug als Sieche mit mache mr hän se kum miese schminke. Dr Stadtstaat isch wieder mol s Pestlager gsi. Mir hän dörfe schminke und Ikleide. Dismol hän mrs sogar gschaft keini Pandabäre z schminke 😉

Mr sin denn alli froh gsi wo d Madame Quitscheänte mit ihrem Gsindel unser Heerlager verloh het. Gott sei Dank isch si uf em Stuehl vom Stephan und nit uf mim gsässe. *hups*

Dr Düsi het eigenlich gar nit wele mitmache aber wo me ihm e Dirne versproch het, het er denn plötzlich doch wele. Was do alles gloffe isch dörf me gar nit verzelle…

Am Sunntig morge sin mr dr Brucheball und Tam go abhole, denn ohni Brucheballtounier gön mir nit heime.

Bim warte ufd Morgemäss sin mir ere komische Gstalt begegnet. Mir hän uns gfrogt und gwärweisst wie die Gstalt in ihri Gwandi ko isch. Mr sin denn dank em Alex uf e Schluss ko, do mues e Tannebaumtrichter im Spiel gsi si. Und per sofort sammlet dr Alex keini Badeänte me! «Rettet die Badeente» «Badeentensammlung zu verkaufen»

D Morgemäss isch völlig dure und bekloppt gsi, mr hän wiedermol dank em Tod em Hässliche Hans und em Bruder Rectus e mängs zlache ka. Da dr Stadtstaat s Brucheballtounier gretter het hä mir e Kiste Bier beko.

Mr hän au dismol wieder einigi Bsuecher dörfe begriesse in unserm Lager. E wunderbare Momänt isch es gsi, wo dr Stephan eim vo unserne Gäst verzellt het, was mir so mache im Heerlager, dass es primär ume Spass goht, mir uns zeige wän und dass es nit hauptsächlich ums suffe goht… Und wer kunt mit dr verdiente Harasse Bier a zlaufe…?!? Unseri Jungs! 😉

Am Nomittag noch em Heerlagerumzug het denn s Brucheballtounier Schwiz gege Dütschland statt gfunde. De Sieg hän mr heime gholt! Leider mit eim verletzte Käpfer aber mit Verlust mues me rächne.

Am Obig, wo langsam alli Gäst vom Gländ verschunde sin und s grosse Abbaue losgange isch, hän mir gemütlich unseri Kuchi verrumt und sin denn alli gmietlich ums Fürli gsässe und hän s Wucheend usklinge lo. Es sin immer mol wieder es paar is Bettli verschuned, bis nur no dr Düsi, Hase und s Nömi am Feufeu ghögglet sind. Mir hän gfunde mir mien no dr Kanister mit Met drin leer mache. De cheibe Kansiter het und het nit wele leer wärde und dr Bächer isch immer wieder hell worde, was gar nit goht, denn de mues dunkel si.

Da s Schreiberlein nit immer si Gschichtsbuech debi het, machts sich hi und da im Zauberkästli Notize. Doch sau doof wenn me nüm weiss, was me demit gmeint het im nochhinein.

Es isch notiert worde: «Ich bin kurz vor dem Karnikel»

D Meinige vom Zämmehang und Sinn vo dem Satz gön so wit usenand, dass s Schreiberlein an dere Stell entscheidet, dass das eifach de Abschlusssatz vo dem Heerlagerwucheend isch.

ICH BIN KURZ VOR DEM KANICKEL! =)

Euer Schreiberlein

Nömi


Zrugg zu de Bilder

Zrugg zu de Bricht