Bericht MPS Weil 2 2017

30. Juni – 3. Juli 2017

Juhu ändlich gohts wieder los ab ins Mittelalter. Am Fritigmorge het de Stephan alli igsammlet und mr sin no schnäll d Zältstange go hole für unser neus Zält, was mr z.T sälber naie. Dismol hän mr dr Rosegarte für uns elei igno. Da mir unsere Köchin Pinky e Kochzält kauft hän und e witers Schloof/Materialzält uns zue do hän bruche mir jetzt e klai weneli meh Platz 😉 Noch däm mr alles schön igrichtet hän und unsere Voroot ufgfüllt hän isch es witer gange mit Zält naie. Unsers Tapfere Schniederli het mit sine Gilfe alles ge. Mr hän alli meh oder weniger Lust druf ka, drum hän e paar noch zwei Schläufli anaie scho wieder uf ge, anderi hän flissig Schlaufe um Schlaufe gmacht. Am Obe hän mr alli e Tour über s Gländ gmacht und hän wele Heerlager anektiere, da aber die andere alli Langwieler gsi sin, sin mr witer gange. Und denn isch si vor uns gstande. Tadaaaa :0) Si isch klei, siess und lockig unser «Löckli» Dr Düsi het wele wüsse, wie alt si isch und so wie mir sin, hän mr se au gfrogt. So schlagfertig, wie si isch het si gfunde er soll mol schetze und isch ganz dicht vor ihn ane gstande. Dr Düsi ganz scharmant: «Afangs 20!?» Si het sich geert gfühlt denn si isch 32 =) dr Düsi licht rot. Am negste morge het er als ersts gfunde: « Wenn dr mi scho verkupple wänd, den nit mit so alte Wieber» Jä Jä Düsi du weisch scho uf alte Pfanne lernt me koche!

 

Dr Samstig isch ächt e hammer tolle Daag gsi. Dr Bruder Rectus het si Morgemäss sowas vo nit im Griff ka. Drum isch alles chli lang gange und mir hän alli mega hunger beko. Dank dr Pinky hän mir sofort könne afo ässe, wo mr zrugg ko sin. Am Nomittag hän mr am Heerlagerumzug de Kevin in d Schandgiege gsteckt, s Nömi het en fest im Griff ka und dr Michi het en mit dr Helebarde züchtigt, wenn dr Sklav gmeint het er mies dumm due. Er isch vo de Zueschauer gfietteret worde und er het sogar Alkohol beko. Defür isch d Ketti immer wie kürzer worde. Noch em Umzug isch es scho los gange mit em Brucheball, unseri Kämpfer Michi, Düsi, Stäldi und Mike (ihn hän mr kurz vor Spielbeginn eifach anektiert und ind Manschaft uf gno) hän sich bis ufd Bruche (Unterbekleidig) uszoge und hän sich uf der Kampf vorbereitet. Dr Stephan, Pinky und s Nömi sin der Fanclub gsi und hän die vier Herre tatkräftig agfüürt. Dr Düsi unseri Blindschlieche isch dr König vom Spiel gsi er het in Rundi eins und drei der 40kg schweri Sack ganz elei ufd Siegeslinie dr

eit. Die andere drei hän mit de andere Spieler kämpft um se ufzhalte. Au dr Hauptmann Wölkchen isch vom Düsi eifach an Spielfäldrand dreit worde. Dr Michi het dr Grizzlibärkämpfer umgnietet und der Stäldi het mol 10min miese Händlihebe mit em Tod, will er sich eifach uf e Brucheballsack glegt het. 10min Tooooodesstrafte!! E geils Spiel isch das gsi und mr hän natürlich gwunne. Zum Sieg hän alli Freibier beko an de Tavärne. Offeni Knü, Fiess und Handglänk ghöre halt zum Spiel. Ächt stark, was unseri Kämpfer do gleistet hän. Zum Znacht het uns Pinky e fette Broote serviert, wo wie immer eifach mega fain gsi isch. Da dr Hauptmann Wölkchen Geburtstag ka het sin mir no zu ihm ins Heerlager und hän uf ihn agstosse und er het e Fläsche Met beko.

 

Am Sunntig morge het s Flauschi vo dr Pinky de Düsi agriffe und d Nöme het de Düsi peitscht. S Morgegrummeli het sich kum gwehrt. 😉 Au hüt hets wieder e Brucheballtounier ge. Unseri Herre sin aber alli so zerstörrt gsi, dass si nüm hän möge teilne. Nur de Stäldi het möge de andere Manschaft ushälfe. Er het de Stadtstaat prima verträtte und si hän als gmischti Manschaft gwunne. Leider het Pinky am Mäntig ind Schuel miese und het somit am Sunntigobig scho hei miese. Si het sich also an dr Tortuga Inn die volli Breitseite ge und isch licht hellblau abzottlet. De räscht het e gmüetliche Obe am Füür verbrocht. Nur de Düsi isch gschändet worde vom Stäldi. Er het em gliendi Holzstückli uf si scho kaputte Fuess gschosse, kurz druf Met agschüttet und isch em ufe Fuess gstande. Irgend öper het sich no Met durch d Nase glo mr wüsse nur nüm wär… aber uf em Notizzettel isch es gstande also muess es au so gsi si… gäll Pinky 😉 Es isch mega gmüetlich gsi ohni Gest no uf em Gländ zsi und allne zue z luegte bim abbaue. Am Mäntigmorge hän mr afo abbaue und dr Michi het sich no mit em Sackmässer in sin scho vom Brucheball verletzte Arm gschnitte bis knapp vor e Muskel. Zum Glück hän mrs könne erstversorge und no fertig abbaue. Denoch sin mr ab is Spital de Michi mit zwei Stich go flicke.

 

Und scho glie gohts witer in Karlsruhe aber bis döt hi wünscht euch dr Stadtstaat e gueti Ziit und freut sich jetzt scho uf e erneut super schöni Ziit mit de Beste Lüüt!

 

Euer Schreiberlein

Nömi


Zrugg zu de Bilder

Zrugg zu de Bricht