31.08-02.09.2018
Endlich geht es los nach Hamburg, genauer gesagt nach Öjendorf. Huch was ist mit mir los? Schreiberlein Nömi hat die Deutsche Sprache gewählt!? Nei nei nei lön mr das wieder ganz schnäll…
Einigi vo uns sin scho am Donnstig agreist und hän scho mega viel ufbaut und igrichtet, somit isch am Fritig, wo de Räst ako isch nüm viel ztue gsi. Die wo gfloge sin, sin am Morge no am Hafe go Fischbrötli jage. Gar nit so eifach, wenn die Händler erst am Nomittag ufmache. Doch mir häns gschaft und hän für alli was leckers mitbrocht.
Jäjä au das mol het unsere liebe Düsi wieder mol alles ge. Aber fön mir doch vo vorne a 😉
Dr Stäldi und Pinky sin im Zält gstande. Pinky unschuldig… ah nei falsch… unkompliziert meini dänkt… Pinky unkompliziert, wie si isch zieht ihres Top ab und in däm Momänt kunt de Düsi is Zält. Er redet mit em Stäldi und dackled wieder use. Total verwunderet luege sich Pinky und dr Stäldi a und bekömme sich nüm i vor lache. Dr Stäldi schreit em Düsi nru no hinter här… «Möpseblitz!»
Bim Grossikauf hän mr zum aller erste mol 2 Wägeli komplett gfüllt. Doch nach em feine Znachtässe, s het Spaghetti ge, hän mr gmerkt, dass mr viel zwenig Alkohol hän (nei mir hän nit z viel gsoffe) Somit isch dr Mike nomol los go ikaufe. S Fazit us dem ganze: Lönd dr Mike nie adrunke go ikaufe… Er kauft viel z viel und het vieli gueti Idee, was me no alles (nit) ka bruche!
Da mir scho komplett fertig gsi sin mit em Ufbau, hän mir e gemütlichi Rundi ka und hän de andere bim Ufbaue könne zueluge.
Am Sunntig Morge sin mr frisch und fröhlich us unserne Better gstiege. S Wätter isch zwar wolkig gsi aber vo de Temperatur här ganz ok. Da dr Düsi am Morgelala gsi isch het er leider scho wieder die nätti Dame verpasst, wo visavie vo unserem Lager en Kettehemli BH aprobiert het. Ja ja er isch und blibt unsere Möpseblitz. 😉
Am Heerlagerumzug (dr gröschti und längsti vo allne MPS) hän mir wieder die wundervoll Ehr ka vo Piccolo begleitet zwärde. Es isch scho e geils Gfühl, wenn me weder vor sich no hinter sich s Änd/Afang vom Heerlagerumzug seht. Noch em Umzug isch s Brucheballtournier los gange. In Hamburg spiel sogar mehreri Wiebschafte. Mir sin aber nur mit de Männer aträtte. Dr Stadtstaat Basel het sich dr 4. Platz erkämpft. S Beste isch gsi, wo si ufd Mannschaft Pearl Portu troffe sin. Die sehn nämlich alli us wie duretrainierti Spartakämpfer. Mir hän alli dänkt oh je das wird nüt… Aber mir hän se zerstört. Ächt geili Aktion gsi Jungs!
Da mr uns entschiede hän am Samstig kei offiziells Znacht z mache, hän mr uns an de Konzärter troffe. Wo mr denn gnueg vom grosse Trubel ka hän, sin mr gemütlich ums Feufeu gsässe. Ziit isch, wie im Nu vergange. Dr Düsi isch fast vo dr Bank keit, will er ipfuust isch. Aber wenn me ihn frogt, hets en nur bisse am Fuess, er isch sicher nit igschloofe. Mir hän alli gwartet bis es 12i isch, denn unsere Hase het Geburtstag! Tam, Hase, dr Waldläufer und s Nömi sin no so lang am Feufeu gsässe bis s Holz usgange isch. D Jungs sin no go Holz «klaue» so dass mr no chli hän könne füüre. Dr Stäldi isch dr erst, wo im Zält verschwunde isch aber mol usnahmswies nit dr erst, wo ufgstande isch. Dr Waldläufer het no bim Zubett go s halbe Zält vom Mike mitgrisse. Au Tam het mol könne usschloofe, die gueti Nordluft duet glaub allne guet.
D Morgemäss mit de drei Schäusslichkeite isch so richtig lustig gsi. Bi richtig schönem Sunneschien sin mr in Tag gstartet. Noch em Zmorgeässe hän mr em Hase si Geschänk überreicht, zumindest e Bild devo. Si neue Smoker hän mr dehei glo. Dr Ufbau vo dem isch scho gnueg miesam gsi aber das isch e anderi langi Gschicht für sich. ..
Mr hän festgestellt, dass dr Lev Hasefäll liebt, er het sich gärn bi dr Pinky und Nici akuschelet. Isch jo aber au kei Wunder als jüngsts Mitglied vo dr Familie Hase. D Pinky het das MPS hard übertribe mit Föteli mache, mir wünsche ihre viel Erfolg bi dr Uswahl für unseri Website. 😉
An der Tortugabar het Tam alles ge. Mr sage so viel, sehr tür isch es nit gsi aber glont het sichs uf alli Fäll.
Zum Znachtässe hän mr Racelette gmacht. Wo mr sin go ikaufe hän mr natürlich Schwizer Kääs welle. Dorum sin mr and Käästeke. S het e viertel Laib Appenzeller ka und no eguets Stück vomene andere. Mir hän beidi abwiege lo und hän gfunde er soll uns grad beidi ipacke. Er frogt mit grosse Auge: «Alles!?» Mir hän grinst und gfunde: «Jo gärn alles.» Er mit no grössere Auge: «Das wird aber meh wie 100€ koste!» «Ja das isch ok so» Dr Kääsverkäufer het denn nur no gfunde, dass er uns eigentlich and Kasse begleit miessti… Er het uns denn aber go lo mit unserm Kääs. Mir hän e richtig guets Racelette am offene Füür könne mache, was mir natürliche sehr gnosse hän. Mr hän no Bsuech beko vom Svenli sim Lager. Noch em guete Ässe hän mir uns an Abbau gmacht, so dass mir am nächste Moege nüm all zu viel zmache hän. Tam, Pinky und s Nömi hän no e Rundi drüllt uf em Festgländ. S Nömi het dörfe ins Wägeli sitze und isch Winkend zum Pfand abge zoge worde. D Gläser hän lut klimperet im Wägeli, als würd e Glocke lüte. Bing Bing Schande! Bing Bing Schande! Unterwägs sin mr no am Bällebad verbie ko, wo mr au no dri ghüpft sin und hän no e wilde Ritt uf de Holzpfärdli ka. Dr Obe hän mr denn am Feufeu usklinge lo.
Am Mäntig morge ischs denn an Abbau und d Heifahrt gange. Da scho bi dr Hifahrt s eine Rad vom Ahänger hi gange isch, isch die Fahrt Heime sehr abenteuerlich worde. Aber die Gschicht mien dr euch besser vom Düsi und Hase verzelle lo. I sag nur so viel Häääääänger!
Mit em MPS in Hamburg schliesse mir au unseri Heerlagersaison ab. Jetzt gohts für dr Stadtstaat Basel ind Winterpause. Aber lagwielig wird uns uf kei Fall. Dr Saisonabschluss vom Michi plant stoht no a und mr hän no vieli gueti Idee, was mir so alles könne mache im negste Joor. S git uf alli Fäll guet z tue.
Mir freue uns uf die nögsti Saison mit euch!
Euer Stadtstaat Basel