22. – 24.Septämber 2017
Mir hän wieder mol e erst mol… Dr Stadtstaat isch am MPS Maxelrain, Es spetziells Örtli mit spetzielle Mensche. Leider sind d Heerlager abseits vom Gländ agortnet worde, somit hän mir nit viel Bsuecher ka, wo sich für unser Lager interessiert hän.
Nach däm mir alles ufbaut hän und Pinky uns e wunderbars Znacht kocht het, sin mr alli zämme ind Brauerei go Dessert ässe und e rundi Bier gno. Zum Dessert hets e abartig guete Kaiserschmarren ge mit caramelisierte Nüss drin und e Öpfelstrudel. Dr Düsi het sich no Weisswürstel bstellt… Mmmm… isch das fain gsi! In so Rundene entstön gueti Idee =) Dr Düsi und s Nömi hän e bsunders gueti Idee ka aber das dörfe mr do aus Gründen nit schriebe, da de Bricht jo veröffentlicht wärde könnt. 😉 Mr sage nur so viel Uiiuiuiuiiii!
Dr Stephan, d Pinky und Nici sin zrugg is Lager und die andere Zwei hän sich no e Bier gönnt. Bim zrugglaufe hän si denn abgmacht, da beidi nüt sehn im dungle, dass si beidi laufe und niemer luegt. Alles isch guet gange bis si zu de Lager ko sin und denn isch eifach so böse böse Stab im Wäg gstande. Zack bum hets Nömi uf e Bode ghaue, alli sin wider wach gsi und s Glächter gross.
D Cynthia und dr Michi sin no agreist an dem Obe und hän sich hüüslich igrichtet. Somit sin mr komplett gsi für das MPS.
Am Samstig sin mr wie allewyyl and Morgemäss doch leider isch es nit so wirklich em Bruder Rektus sin Daag gsi. Sini Luune isch nit bsunders guet gsi, drum sin mr froh gsi, wo mr zrugg is Lager ko sin und döt es guets Zmorgeässe uf uns gwartet het.
Leider hets am hüttige Daag e chline grössere Umfall ge. Denn es het sich e Binli im Met vom Stephan verrirrt. Viellicht hets gmeint es mies sich sin Honig zrugg hole, uf jedefall het dr Stephan das z spoht gmergt und scho hets zuegstoche. Ihm diräkt ind Lippe =( Die isch natürlich digg agschwulle und sin so digg worde, dass er nüm het könne us sim Bächer trinke. Drum isch ihm denn es Röhrli organisiert worde, mr lön jo schliesslich unsere Stadthalter nit uf em droggene sitze. Er hets denn sogar gschaft am Heerlagerumzug debi zsi, denn das het er sich nit wele lo neh.
Am Nomittag hets denn no e Rundi Kochlöffelbaseball ge, do dezue unbedingt Ufzeichnige a luege. Unseri Herre händ sich no dueliert mittels Schwärtkampfiebige mit de Heerlager Nochbere. Zum Znachässe het d Pinky wieder mol was hervorragendes zauberet: Kürbis Nioggi mit Gulage
Noch em Znacht sin mr singend über s Gländ gloffe und sin zu de Füürstelle go ane sitze. E wunderbari und mega schöni Stimmig, s gseht alles wie verzauberet us im Füür- und Kerzeschien. Nici isch unseri härtisti Kriegerin gsi an dem MPS si isch trotz Krankheit voll debi gsi und isch sogar as Fiedlers Green Obekonzärt. Da mir, wie immer am Samstig voll uf de fritte sin glie mol is Bettli verschwunde.
Früsch usgschlofe und wieder voller Tatedrang, sin mr and Morgemäss. Mr sin noni wit gsi, isch em Düsi sis Stiefeli gstorbe. Sini Schuehsohle het sich glöst und het nur no ganz vorne e bitzeli ghebt. Aber es wär nit de Düsi, wenn er nit eifach dureghebt hät und so and Morgemäss «gummplet» isch. Da dr Michi (schande über ihn) sini Fädere z Basel lige loh het und somit sini Uniform nit komplett gsi isch, isch er Teert und Gfäderet worde. Dr Teer schön ind Knühkehle damit er bi jedem Schritt weiss, was er vergässe het und natürlich het dr Rektus au vorne abe, schön ind Bruche ine das kläbrige Züg lo laufe. Nochdäm er no mit Fädere gschmückt worde isch, het dr Rektus ihn mittels Kuss erlöst vo sindere Schandtat. D Cynthia isch aschliessend em Michi go hälfe entfäderle und grobreinige, damit de Michi het könne go dusche. Suber putzt und gstrält isch es denn zum Sunntigsbrunch gange.
Am Nomittag hän mr no e chlini Ikaufstour gmacht und Julia isch bi uns verbie ko. Es isch schön z merke, dass mr langsam aber sichr zur grosse MPS-Familie dezue ghöre. Me kennt uns 😉
Am Obig hän mr miese d Cynthia und dr Michi scho wieder verabschiede, si hän zrugg uf Basel miese. Uf em Ruggwäg zum Lager hän d Herre no e Abstächer zu de andere Lager gmacht, zum go Idee sammle und Lüt kennelerne. S Nömi het sich vo ihrne edle Dame Pinky und Nici mit em Wägeli über s Gländ lo zie. Da me jo e Ziel brucht, hän mr gfunde mr gön unsere Metvorrat go ufrüste. Bi Beerenwein ako hän mr natürlich für Ufsehe gsorgt und uns sin sogar Goldtaler zuegworfe worde. Somit isch entschiede worde, dass me das uf witere MPS widerhole wird.
Wos langsam dunkel worde isch und sich d Kälti breit gmacht het, sin mr alli ums Füür gsässe und hän singversiech gstartet. Leider isch uns das nüm so ganz glunge. Me weiss nit genau wora s gläge isch aber me het das gjomer miese abklemme. S Nömi het denn eifach allne s Singbuech wäg gno, jedoch het das nit viel gnutzt, denn Nici und Pinky hän eifach witer trälleret. =) D Julia het sich au nomol zu uns gsellt und het us ihrem Naikästli plauderet.
Wies so isch indere Gruppe me ka sich au mol falsch verstoh und scho kas dätsche. Irgendwie hän sich s Nömi und de Stephan nit so richtig verstande und sin anenand grote. Nochere kurze Usziit vom Stephan hän si denn aber sich nomol könne usspräche und hän beidi gmergt, dass si schlicht und eifach anenand verbie gschwätzt hän. Somit isch denn alles wieder guet gsi und me het sich könne in Arm ne. Au so Momänt bruchts imene Heerlager.
Am Mäntigmorge isch die grossi abbau und putz Aktion los gange. Da mir imene Sumpfloch (Matschelrain) unser Lager stoh ka hän, het halt alles dämentsprächend us gseh. S Fazit vo dem MPS: Familiär, sumpfig, mol was anders als bishärigi MPS jedoch uf jedefall e würdige Abschluss.
Mr freue uns jetzt scho uf die negsti Saison und hoffe, dass de Winter nit all zu lang und hart wird!