29.06-01.07.2018
Es goht witer dr Stadtstaat Basel freut sich uf es wites Wucheänd in Weil am Rhein. Mir sin zrugg im Rosegarte. Da unser Stadthalter und sini Gemahlin verhindertet gsi sin hän mr dr Ufbau ohni si miese bestritte aber das isch prima gange. Wo denn alles grob gstande isch, sin dr Stäldi und Nöme go ikaufe. Leider isch dr Stäldi nit so e erfahrene Wägelimaa und d Nöme het sich mit ihm durch dr Lade kämpft. Zum Glück sin no alli Zeche dra und die blaue Fläcke nit all zu schlimm. Zrug im Heerlager, hän sich alli ufs Zmittag gfreut. Fleischkääsbrötli mit Bier. Ah nei finde den Fehler! Jä dr Stäldi het s Bier vergässe izkaufe… Tja unsere Wägelimaa 😉
Am drei sin mr fertig gsi mit ufbaue und ikaufe, somit hän mr uns gmietlich mit Spiele vergniegt. Da em Hase sini Gemahlin am Mäntig ihre gmeinsame Sohn Lev zur Wält brocht het, hän mr am Obe uf e Hase miese verzichte. Er isch denn am negste Morge wieder zu uns gstosse.
Wie allewiel hän mir dr Tag gstartet mit der Morgemäss und emene riechhaltige Zmorgeässe. Dr Düsi und Hase sin ufd Suechi nach em Arnold. Dr Arnold isch unsere härtischti und tapfersti Kämpfer. Er isch duchs Feufeu gange am MPS Weil 1 und er het das überläbt. Leider hän mr en miese zrugg lo an der Füürstell. Doch die beide sin ufd Suechi noch ihm und hän en au gfunde. Dr Ast Arnold het en Ehreplatz beko im Heerlager. Us unerklärliche Gründ isch er denn aber au wieder verschwunde.
Au das mol hets wieder e Brucheballtournier ge. Basel gege Dresten. E harts Spiel isch es gsi. Hase het miese 10 Sekunde Todessrafe dure stoh und isch denn au no usgnockt worede. Doch dr Stadtstaat Basel het de Sieg hei brocht. Mit emene Slomovideobewies häns d Schiedsrichter denn au akzeptiert, dass Basel de Sieg verdient het.
Da d Chefköchin uns dasmol nit het könne begleite, ischs Kuchihälferli Nöme uf sich elei gstellt gsi. Doch s Ässe isch hervorragend gsi und s het allne gmundet. Sogar em Stäldi s Rotkrut. Dezue hets e Brote ge. Da dr Düsi nit het könne uf eins zelle hets e riese Feufeu ge.
Au dr Sunntig het mit prima Wätter glänz. S ganze Wucheänd isch es sehr heiss gsi, so dass einigi bim Heerlagerumzug us de Reihe tanzt sin damit ihri zarte Fiessli nit uf em heisse Teer verbrenne. Unglaublich isch eimol unsere Stadthalter nit ume gits kei Zucht und Ordnig me. Mr bruche eidütig e Hauptma!
Dr Stephan isch denn doch no zu uns gstosse und het mit uns könne dr Sunntig gniesse. Da unseri Brucheballgegner dr Schwanz izoge hän und nüm hän wele spiele, hets am Sunntig kei Tounier ge. Dr Stadtstaat Basel hät dismol sogar e Wiebschaft bereit gestellt. Aber nai Mimimimi es isch zu heiss, mimimimi zu asträngend, mimimimi und überhaupt… heul… Hän doch alli kei Lust ka scho wieder gege uns zverliere. Pünkt hän mr denn glich beko.
Da s so heiss gsi isch, isch au nüm viel gloffe. Einigi Bsuecher hän mr bi uns im Lager dörfe begriesse. Dr Michi het flissig am Tisch witer gschnitzt und au d Cynthia isch kreativ gsi. Sie het sich us Hasefäll öpis gnait. Ziit isch wieder viel z schnäll verbie gange und scho wieder isch e wunderschöns Wucheänd mit Fründe und Familie verbie. Gnosse hän mrs alli und freue uns scho ufs negste MPS!